Begegnung der Jugendlichen mit dem Papst

in Echternach am 16. Mai 1985

Als Fest der Freude wurde die Begegnung zwischen Johannes Paul II. und den Jugendlichen in Echternach am 16. Mai 1985 beschrieben.

Die Jugendlichen wollten dem Papst
ihre Anliegen anvertrauen und stelltem sie unter die Leitmotive:

 

VERTRAUEN WAGEN

"Léiwe Brudder a Christus, Bëschof vu Roum!

Mir si jonk an idealistesch, mir si bereet ze vertrauen: Et kann ee verantwortungsvoll mat Gottes Schöpfung ëmgoen; Gléck, Solidaritéit, Fridden a Fräiheet si méiglech.

Eist Vertraue baut op um Glawen u Christus. Hien huet déi total Léift an déi onbegrenzte Barmhäerzegkeet gelieft, déi iwwert alle Gesetzer an Traditioune stin. Hien huet eis gewisen, datt bei Gott alles méiglech as, och wann näischt méi ze goe schéngt.

Wéinst him traue mir eis selwer eppes zou, wéinst him traue mir eise Matmënschen, wéinst him vertraue mir der Gemeinschaft vun de Krëschten. Si kann eis e Wee zu Gott weisen an eis Beispiller gi fir ee Liewen a Relatioun mat Gott: ee Willibrord, ee Franz von Assisi, déi anonym Uerdensfra weisen eis: d'Biergpriedegt as keng Utopie; glafwierdeg Laien a Geeschtlech halen duerch hiren Engagement den Dram vun enger besserer Welt, dem Räich vum Herrgott, waakreg!

Dacks awer hu mir Zweifel un eis selwer an un der Kiirch, well d'Kiirch a mir selwer oft nët genuch vum HI. Geescht geprägt a kaum Salz vun der Welt sin. Heiansdo mécht d'Kiirch eis et scho schwéier ze vertrauen. Hir Traditioun erstéckt munch nei Iddien. ViII vun eis verstin z. B. nët, firwat d'Frae vun der Wei ausgeschloss gin a firwat d'kiirchlecht Gesetz esou haarthaerzeg as vis-à-vis vun denen, déi gescheed an eng zwete Kéier bestued sin. Mir bedaueren, datt déi verschidde krëschtlech Konfessiounen nach ëmmer getrennt sin. Oft géife mir eis éischter en Encouragement wéi e Verbot wënschen.

Trotz eisen Zweifel a Bedenke si mir awer gar bereet, an enger lieweger Gemeinschaft vu Krëschte matzemaachen: Et as derwäert!"

top

"SOLIDARITÉIT HEIHEEM"

1. Persoun:
"Die Generäle haben sich zum Golfspiel entschlossen; Diktatoren öffnen die Straflager. Nicht krümmt sich der Finger am Abzug des Gewehrs. ln der Folterkammer wird Brot gebacken!"

2. Persoun:
"Das verleumderische Wort bleibt hinter den Lippen gepreßt. Man fangt an, die Wahrheit zu sagen. Man läßt den Gegner zu Wort kommen!"

3. Persoun:
"Je komm! Hal dach op! Ech kann dat nët méi héieren: Déi naiv Dreem vun enger besserer Welt! De Mënsch as a bleift en Egoist! Solidaritéit as en eidelt Wuert!"

Kouer: "Solidaritéit ... en eidelt Wuert!"

4. Persoun:
"Oder as et vlaicht keen eidelt Wuert, wann esou oft an eise Famillien ee vum anere kalbliddeg profitéiert, ouni vun sech aus Entgéintkommen a Waermt dran ze investéieren? Oder wa mir an eisen zwëschemënschleche Bezéiungen ëmmer nëmme froen: Wat hun ech dovun?"

Kouer: "Solidaritéit ... en eidelt Wuert!"

5. Persoun: "Wa mer rücksichtslos am Stroosseverkéier eis d'Virfahrt erzwéngen oder op onverantwortlech Manéier onschëllegt Liewen a Gefor bréngen? Wann an eise Schoulen a Schmelze - grad a Krisenzäiten - den erbarmungslose Kampf ëm d'Plaz Kollegen zu Géigner mécht.

Kouer: "Solidaritéit ... en eidelt Wuert!"

6. Persoun:
"Mir spiren an eis en déiwe Wonsch no echter Solidaritéit. Christus selwer huet hir jo en neien Numm gin: Solidaritéit as Léift! Si mécht bereet, mam Bléck op de Matmënsch eisen Egoismus ze iwwerwannen. Jo, mir wëlle Solidaritéit liewen!"

Kouer: "Solidaritéit ... liewen!"

7. Persoun: "Mat den Alen a Kranken, mat de Friemen an de Minoritéiten, mat denen, déi anescht denken, an denen, déi ëm hir Aarbecht baangen, a mat all denen, déi sech asetze fir méi eng mënschlech Gesellschaft. "

Kouer: "Solidaritéit ... liewen!"

8. Persoun: "Dësen Dag soll fir eis een neie Start sin zu méi Solidaritéit och an a mat der Gemeinschaft vun all denen, déi op den Numm vu Christus gedeeft goufen, solidaresch och an a mat der Kiirch!"

"SOLIDARITÉIT IWWER D'GRENZEN ERAUS"

A: "Faire ensemble un monde nouveau.
Solidaritéit liewe wëlle mir iwwer d'Grenze vun eisem klenge Lëtzebuerg eraus. D'Geographie an d'Geschicht hun eist Ländchen tëscht zwou verschidde Kulturen a Sprooche gestallt. Mir kënnen eis et nët leeschten, ëm eis selwer ze kresen. Mir wëssen, datt Brécken ze baue sin. Grad hei zu lechternach reeche mir all Joer sou ville jonke Frënn d'Hand. Vill vun hinne stin der och haut hei mat eis zesummen. Mir all si bereet, matzebauen un enger neier Welt, an dat nët nëmmen am internationale Joer vun der Jugend.“

B: "Mir hu vun Ufank u matgebaut un engem neien Europa. Mir stin zu deem Europa! Mir froen eis allerdings: As dat Sichen no europaescher Eenheet a Solidaritéit nët zevill vu Wirtschaft a Finanze gezeechent? Gin och déi geeschteg a reliéis Waerter mat agebaut, déi den eigentleche Räichtum an d'Séil vun eiser europäescher Kultur ausmaachen? Mir hoffen och, datt an Europa nach Barrièren a Mauere falen an datt ganz Europa en neie Fridde fënt, an deemall Europaer Bridder gi kënnen."

C: "Solidaritéit liewe wëlle mir iwwer Europa eraus mat anere Kulturen a Rassen. Als jonk Krëschte wëlle mir eis asetzen, datt eis Kiirch och an der Zukunft eng missionaresch Kiirch bleift, déi bei hirem missionareschen Engagement nët nëmme schenkt a gët, ma och eng Beräicherung fënt. Duurch eisen Asaatz an der Entwécklungshëllef wëlle mir wéi an der Vergaangenheet och weider matbauen un enger méi gerechter Welt. Dës eis Bereetschaft wollte mir grad bei Äerem Besuch konkret ausdrécken. D'ganz (Lëtzebuerger) Jugend huet matgebaut un enger Aktioun, bei daer mir Äer Mathëllef brauchen!"

Übergabe eines Schecks der Aktioun ABC in Höhe von 2,4 Millionen Franken (59.500 €) zugunsten der Slumsbewohner von Nairobi in Kenia.

 

top

FREIHEIT SUCHEN

"Nach ni hat eng Generatioun an Europa materiell esou vill Méiglechkeeten wéi haut. Trotzdeem bleift ais d'Zukunft oft verbaut. Wa mer eng Aarbecht fannen, as et nach glat nët esou sécher, dass et déi as, déi mer äis gewënscht hun.

Nach ni goufen enger Generatioun esou vill verschidde Weer zum Gléck ugebueden ewéi äis haut. Trotzdeem hu mer hei zu Lëtzebuerg ee Selbstmordversuch pro Dag, weil nach ni ware mer der Manipulatioun an der Onsécherheet esou ausgesat.

Munech Jugendlech, och wann se nët méi an d'Kiirch gin, gesin nach e Sënn an engem krëschtlechen an engagéierte Liewen. An der Kiirch, der Gemeinschaft vun de Krëschten, proposéiert Jesus Christus ais e Wee, deen ais elo schon zur Fraiheet féiert.

Leider schéngen ons awer déi erwuesse Krëschten oft nët méi fräi wéi déi aner Leit. Wa munech Krëschte méi echt, fredeg, flexibel a méi engagéiert wären, kënnte mer äis méi liicht fir de Wee mat Jesus Christus entscheden.

Mir hoffen op eng Kiirch, déi aus Léift zu Jesus Christus an am Vertrauen op den Hellege Geescht méi fräi a méi geloosse mat den Angschten a mat de Wënsch vun de Mënschen ëmgeet.

Mir wënschen äis méi Fraiheet an de liturgesche Formen a méi Gläichberechtegung tëscht Mann a Fra. Mir froen eis: Firwat kann de Geeschtleche nët tëscht Zölibat a Bestietnes wielen? Mir wäre frou, wann och op eis Menung géif gelauschtert gin.

Dat wäre fir äis Zeeche vun enger lieweger Kiirch; eng Bestätigung, dass déi Kiirch sech Suerge mécht ëm eis Fräiheet an ëm eis Erléisung.

Déi Laien an déi Geeschtlech aus Ost a West, déi sech fir eng (sozial, psychologesch, politesch a reliéis) echt Befreiung asetzen, si fir äis Zeie vun där Suerg. Si si fir äis e liewegt Bild vum Wiirke vu Christus a vum Hellege Geescht. "

top